அமலனாதிபிரான் - 4

அமலனாதிபிரான் - 4
சதுர மாமதிள் சூழ் இலங்கைக்கு இறைவன் தலைபத்து
உதிர ஓட்டி* ஓர் வெங்கணை உய்த்தவன் ஓத வண்ணன்*
மதுரமா வண்டு பாட மாமயில் ஆட அரங்கத்தம்மான்* திரு வயிற்று
உதர பந்தம் என் உள்ளத்துள் நின்று உலாகின்றதே.

[விளக்கம்]
சதுரமான வடிவில் உயர்ந்த மதில்களால் சூழப்பட்ட இலங்கை நகரம்; அதன் தலைவனாக திகழ்ந்த ராவணன்; அவன் வீரனாக இருந்தாலும் அதர்ம செயல்களில் ஈடுபட்டதால் ராமனின் கோபத்திற்கு ஆளானான். யுத்தத்தில் ராமன் ராவணனை ஓடவிட்டுத் தொலைத்தான். வீரனான அந்த ராமன் காண்பதற்கு அழகிய கடல் வண்ணன்.

முன்னர் ராவணனை வீழ்த்திய அந்த ராமனே இந்த அரங்க மாநகரத்தின் ஸ்வாமியாக உள்ளான். இந்த அரங்க நகருள் வண்டுகள் இனிமையாகப் பாடுகின்றன. சிறந்த மயில்கள் அந்தப் பாட்டிற்கு ஏற்றார் போல ஆடுகின்றன. இன்று அந்த அரங்கனின் (ராமனின் கம்பீரமான) அழகு என் நெஞ்சத்தில் நிலையாக நின்று, மெல்ல அழகாக பவனி வருகின்றது. இந்த அரங்கனின் திருவயிற்றைச் சுற்றி உள்ள ஆபரணம் ஒன்றே போதும் என் உயிரைக் கொள்ள (கொல்ல) !

(சொற்பொருள்)
ஓதம் - கடல்
ஓத வண்ணன் - கடல் நிறத்தன்
உதரம் - வயிறு
உதரபந்தம் - வயிற்றில் கட்டப் பெற்றிருக்கும் ஒருவகை அணிகலன்; அரைப் பட்டிகை;

[கூடுதல் விளக்கம்]

(தலைபத்து உதிர ஓட்டி ஓர் வெங்கணை உய்த்தவன்) - குணசீலனான ராமன், எதிராளி பலம் இழந்த நிலையில் அவனோடு போர் புரியாதவன். போரில் பலம் குன்றிய ராவணனை, "இன்று போய் நாளை வா" என்று போர்க்களத்தை விட்டு நீங்கச் செய்தான். உண்மையில் ராவணன் திருந்த இன்னொரு வாய்ப்பினை அளித்தான். இந்த வாய்ப்பினையும் மறுத்து, மறுபடியும் போர்புரியவே ஆவல் கொண்டு, செருக்குடன் ராவணன் திரும்பியபொழுது, வேறு வழி இல்லாமல் அவனைக் கொல்ல நேர்ந்தது. ராமன் அந்த அதர்மனின் தலைகள் பத்தினையும் உதிருமாறு சரங்களை எய்தியும் மீண்டும் மீண்டும் அவை முளைத்தெழ, (விளையாடியது போதும் என்று) பின்னர் ஓர் கொடிய அம்பினை(ப்ரம்மாஸ்திரத்தை) விடுத்து ராவணனின் உயிரைத் தொலைத்தான்.


(உதரபந்தம் என் உள்ளத்துள் நின்று உலாகின்றதே) - உதரபந்தம் என்ற அந்த ஆபரணம் என் நெஞ்சில் மெல்ல பவனி வருகின்றது. அரங்கன் பவனி வருகின்றான் என்பது குறிப்பு.

(மதுரமாவண்டுபாட மாமயிலாட) -ராவண யுத்தம் செய்த களைப்பைப் போக்கிக் கொள்ள ராமன் ஸ்ரீரங்கம் வந்து சயனம் கொண்டுள்ளதாக ஒரு ஐதீகம். அவனை சந்தோஷப்படுத்தும் விதமாக ஆடல் பாடல் காரியங்களை வண்டுகளும் மயில்களும் செய்கின்றன. சிறந்த வண்டுகள் மிகவும் இனிமையாகப் பாட, சிறந்த மயில்கள் அந்தப் பாட்டிற்கு ஏற்றார் போல நடனமாட, ரசிக சிரோன்மணியான ராமன் அவற்றை எல்லாம் "நன்று! நன்று !" என்று ரசித்துக் கொண்டு இருக்கிறான்.


[ஒப்புநோக்கு]
(மதுரமா வண்டு பாட மாமயில் ஆட) - ஸ்ரீ ரங்கத்தின் சோலைகளில் அரங்கனின் அருகாமையில் உள்ள சந்தோஷத்தில், "வண்டுகள் பாடும், மயில்கள் ஆடும்" என்று தொண்டரடிப்பொடி ஆழ்வாரும் பாடுகிறார்.
"வண்டினம் முரலும் சோலை, மயிலினம் ஆலும் சோலை..." [ திருமாலை(14)]